iTunes kveður eftir átján ára samfylgd

Apple tilkynnti á mánudag að tónlistarforritinu iTunes yrði skipt út fyrir þrjú ný forrit. Eitt forrit fyrir hlaðvörp, annað fyrir kvikmyndir og hið þriðja fyrir tónlist líkt og er nú í iPhone og iPad. CNN greinir frá.

iTunes hefur fylgt Apple-vörum notenda frá árinu 2001 og kannast því langflestir við tónlistarforritið sem umbylti því hvernig fólk hlustaði á tónlist á sínum tíma. Í gegnum iTunes gat fólk keypt nýja tónlist, brennt geisladiska og búið til spilunarlista með sínum uppáhalds lögum sem þótti nýlunda á þeim tíma.

iTunes kom fyrst fram á sjónarsviðið fyrir átján árum og fylgdi iTunes Store tveimur árum síðar. Þar gátu notendur keypt tónlist beint í símann sinn og tónhlöður. Á þeim tíma börðust margir tónlistarmenn við það að vinna gegn ólöglegu niðurhali og var þetta því góður kostur fyrir fólk sem vildi kaupa tónlist á löglegan hátt í góðum gæðum.

Notendur munu áfram geta keypt tónlist í gegnum iTunes Store og gildir það sama um kvikmyndaforritið þar sem notendum stendur til boða að kaupa kvikmyndir og sjónvarpsþætti.