Neymar svaraði fyrir sig í skýrslutöku í Brasilíu

Neymar, framherji PSG og brasilíska landsliðsins, mætti í gær á lögreglustöð í Sao Paulo til þess að svara fyrir ásakanir um nauðgun.

Neymar hefur komið fram opinberlega og neitað ásökunum en hann er sakaður um að hafa nauðgað konu á hóteli í Frakklandi. Þau kynntust á samskiptamiðlinum Instagram.

Brassinn hefur stigið fram og gerði meðal annars sjö mínútna myndband á Instagram á sunnudaginn þar sem hann sagði að ásakanir væru gerðar til þess að kúga Neymar.

Neymar mætti í skýrslutöku í Brasilíu í gærkvöldi en hann mætti í svörtum jakkafötum og á hækjum vegna meiðsla sinna.

Konan sem sakar Neymar um nauðgunina hefur nú þegar rætt við lögregluna í Brasilíu.