Guðmundur í sigurliði en enginn Kolbeinn

Guðmundur Þórarinsson var í byrjunarliði Norrköping sem vann 2-0 sigur á AIK í stórleik í sænsku úrvalsdeildinni í dag.

Guðmundur nældi sér í gult spjald á 24. mínútu en Christoffer Nyman kom Norrköping yfir einni mínútu fyrir lok fyrri hálfleiks.

Á 55. mínútu fékk Panajotis Dimitriadis beint rautt spjald og það nýttu gestirnir frá Norrköping sér. Nyman skoraði annað mark sitt á 63. mínútu og lokatölur 2-0.

Selfyssingurinn lék allan leikinn á miðjunni fyrir Norrköping en þeir eru í sjötta sæti deildarinnar.

Kolbeinn Sigþórsson var ekki í leikmannahópi AIK sem er í þriðja sætinu, þremur stigum á undan Norrköping.