Skjálftinn fannst frá Hvammstanga í vestri til Húsavíkur í austri

Skjálftinn sem reið yfir á Norðurlandi í nótt fannst víðs vegar um Norðurlandið, allt frá Hvammstanga í vestri og að Húsavík í austri. Skjálftinn var 4,3 að stærð en upptök hans voru um 20 kílómetrar norðnorðvestur af Siglufirði. Veðurstofu Íslands bárust yfir 130 tilkynningar vegna skjálftans en hvorki Veðurstofunni né lögreglunni á Norðurlandi eystra bárust tilkynningar um slys á fólki eða eignatjón. Búast má við því að eftirskjálftar muni koma í kjölfarið. Að svo stöddu hafa nokkrir eftirskjálftar mælst, sá stærsti 2,7 að stærð. Upptök skjálftanna virðast vera á um 8-10 kílómetra dýpi.

Skjálftinn varð vegna jarðskorpuhreyfinga á Tjörnesbrotabeltinu. Staðsetning skjálftans er þar sem suðurendi Eyjafjarðaráls og vesturhluti Húsavíkur-Flateyjarmisgengisins mætast.

Öflug jarðskjálftahrina varð á svipuðum slóðum haustið 2012. Stærstu skjálftarnir í þeirri hrinu voru 5,6 og 5,4 að stærð. Árið 2018 urðu þrír skjálftar stærri en 3,0 að stærð á svæðinu, en skjálftinn í nótt er sá fyrsti síðan 2012 sem er stærri en 4,0 að stærð. Því má segja að skjálftar af þessarri stærðargráðu eru þekktir á þessu svæði.