SGS vísar deilu til Félagsdóms

Starfsgreinasamband Íslands hefur samþykkt að höfða mál fyrir Félagsdómi þar sem látið verður reyna á túlkun samningsákvæðis frá 2009 um skyldu sveitarfélaga til að ganga til kjarasamningsviðræðna um jöfnun lífeyrisréttinda.

Þetta kemur fram í tilkynningu frá SGS sem segist harma afstöðu Samninganefndar Sambands íslenskra sveitarfélaga um að neita að ganga til kjarasamningsviðræðna um hvernig ná megi fram jöfnuði milli almenna og opinbera lífeyriskerfisins, sérstaklega hvað félagsmenn aðildarfélaga SGS og almennt verkafólk í þjónustu sveitarfélaganna varðar, líkt og samið var um í kjarasamningum 7. júlí árið 2009.

„Nú þegar hefur stærsta sveitarfélag landsins ákveðið að efna samkomulag aðila fyrir sitt leiti en önnur þverskallast við og neita einfaldlega að ganga til viðræðna um jöfnun lífeyrisréttinda starfsmanna sinna á þeirri forsendu að þau hafi aldrei undirgengist slíka skyldu,“ segir í tilkynningu SGS.

Hafnar SGS þeirri afstöðu alfarið og segir ráð gert fyrir þessari óefndu jöfnun í öllum forsendum og útreikningum aðila eftir 2009.