Arnór Ingvi skoraði tvö í stórsigri Malmö

Suðurnesjamaðurinn Arnór Ingvi Traustason fór mikinn í liði Malmö í dag þegar liðið fékk Falkenbergs í heimsókn í sænsku úrvalsdeildinni í fótbolta.

Romain Gall kom Malmö yfir snemma leiks og eftir hálftíma leik tvöfaldaði Markus Rosenberg forystuna eftir undirbúning Arnórs Ingva. Staðan í leikhléi 2-0.

Arnór Ingvi batt svo endahnútinn á sókn Malmö á 54.mínútu. Aðeins þrjár mínútur liðu uns Arnór skoraði annað mark sitt og fjórða mark Malmö.

Guillermo Molins kom Malmö svo í 5-0 á 66.mínútu og reyndust það lokatölur.

Malmö er í 2.sæti deildarinnar en hefur jafnmörg stig og topplið Djurgarden þegar tíu umferðir eru eftir af mótinu.