Rúrik í agabanni hjá Sandhausen

Rúrik Gíslason var ekki í leikmannahópi Sandhausen sem vann 0-2 útisigur á Heidenheim í þýsku B-deildinni í dag.

Þýskir fjölmiðlar fullyrða að Rúrik hafi verið í agabanni vegna hefnibrots á æfingu í síðustu viku.

Uwe Koschinat, knattspyrnustjóri Sandhausen, var loðinn í svörum eftir leik. Hann talaði um að eitthvað hefði gerst í síðustu viku sem ekki var hægt að líta framhjá.

Koschinat sagði jafnframt að Rúrik myndi mæta á æfingu hjá Sandhausen á morgun.

Rúrik hefur leikið fjóra leiki með Sandhausen á tímabilinu, þrjá í deild og einn í bikar. Hann hefur leikið með liðinu frá því í janúar 2018.