Einn myrtur og minnst níu særðir í Frakklandi eftir hnífaárás

Einn var myrtur og minnst níu aðrir særðir í borginni Villeurbanne í Frakkalandi í dag eftir meinta hnífaárás samkvæmt upplýsingum sem lögregla veitti Reuters fréttastofunni.

Hinn grunaði hefur verið handtekinn og hafði þá hníf í fórum sér. Haft er eftir ónefndum heimildarmanni Reuters fréttastofunnar innan lögreglunnar að nítján ára ungmenni hafi látist í árásinni.

Hinn grunaði er sagður hafa ráðist á fólk sem beið á strætóstöð og hafi síðan hlaupið í átt að neðanjarðarlestarstöð þegar hann var stoppaður af starfsfólki og öðrum óbreyttum borgurum.

Enn er óljóst hvað lá að baki árásinni, sem átti sér stað í kringum hálf þrjú í dag að íslenskum tíma. Samkvæmt heimildum CNN er árásin ekki rannsökuð sem hryðjuverk eins og sakir standa.