Clueless leikkona handtekin

Leikkonan Stacey Dash, sem er hvað þekktust fyrir að leika í grínmyndinni Clueless með Alicia Silverstone var handtekin fyrir líkamsárás í Flórída í gær í tengslum við heimiliserjur. Henni er gert að hafa ýtt, klórað og slegið eiginmann sinn, sem hún deildi við, svo sá á honum.

AP vitnar í skýrslu lögreglunnar og segir þar koma fram að áfengi eða fíkniefni hafi ekki komið við sögu.

TMZ hefur komið höndum yfir símtal Dash til Neyðarlínunnar þar sem hún kallaði eftir aðstoð lögreglu. Hún sagði eiginmann sinn hafa tekið sig hálstaki eftir að hún var að rífast við fimmtán ára stjúpdóttur sína og hrinti henni. Í enda símtalsins sagði Dash að ekki væri þörf á lögregluþjónum þar sem allt væri orðið rólegt aftur.

Þá má heyra eiginmann hennar koma til hennar og skamma hana fyrir að hafa gert stjúpdóttur hennar eitthvað. Ekki heyrist hvað.

Dash var hins vegar handtekin þegar lögregluþjóna bar að garði. Dash, sem var sleppt gegn tryggingu í dag, hefur leikið í ýmsum kvikmyndum og þáttum en hún starfaði hjá Fox New frá 2014 til 2017. Hún giftist eiginmanni sínum, Jeffrey Marty, í fyrra.



TMZ birti í kvöld myndband sem tekið var með vestismyndavél eins lögregluþjónsins þegar hún var handtekin.

Uppfært: Upprunalega stóð að Reese Witherspoon hefði leikið í Clueless. Það var auðvitað Alicia Silverstone.