Þrjú fíkni­efna­mál á Lauf­skála­réttar­helginni

Alls komu þrjú fíkniefnamál upp á Laufskálaréttarhelginni og var um að ræða talsvert magn fíkniefna sem talið er að hafi verið ætluð til sölu á svæðinu.

Þetta kemur fram í færslu á Facebook-síðu lögreglunnar á Norðurlandi vestra. Þar segir að hátíðin hafi tekist vel til og mikill fjöldi hesta og manna verið saman kominn í Skagafirðinum þar sem veðrið lék við viðstadda.

„Fóru réttirnar vel fram sem og viðburðir tengdir helginni. Á áttunda tug ökumanna voru stöðvaðir fyrir ýmiss umferðarlagabrot og var þar of hraður akstur mest áberandi. Þrjú fíkniefnamál komu upp á helginni en um var að ræða talsvert magn fíkniefna er talið er að hafi verið ætluð til sölu á svæðinu. Þau efni komust því ekki í umferð og er það vel. Naut lögreglan aðstoðar fíkniefnaleitarhunds og þjálfara lögreglunnar á Austurlandi en fjöldi lögreglumanna stóð vaktina um helgina.

Fyrri part vikunnar lagði lögreglan á Norðurlandi vestra hald á umtalsvert magn fíkniefna. Þar var um að ræða bæði kannabisefni og örvandi efna sem talin eru hafa verið ætluð til sölu. Þá voru, í vikunni sem leið, sex ökumenn kærðir vegna gruns um akstur undir áhrifum ávana og -fíkniefna,“ segir í færslunni.