Umfjöllun og viðtöl: Afturelding - Stjarnan 21-31 | Stjörnukonur miklu betri í seinni hálfleik

Stjarnan bar sigurorð af Aftureldingu, 21-31, þegar liðin mættust að Varmá í Mosfellsbæ í Olís-deild kvenna í dag.

Þetta var annar sigur Stjörnunnar í röð. LiðiðStjarnan er með 15 stig í 3. sæti deildarinnar.

Þetta var fyrsti leikur Aftureldingar eftir að Haraldur Þorvarðarson hætti þjálfun liðsins. Mosfellingar eru án stiga á botni deildarinnar.

Stjarnan leiddi allan tímann en Afturelding var ekki langt undan lengi framan af.

Í fyrri hálfleik varð munurinn aldrei meiri en fjögur mörk.

Sóknir Aftureldingar voru hægar og langar en skiluðu ágætis árangri. Liðið skoraði 13 mörk í fyrri hálfleik og var með fína skotnýtingu (62%).

Vörn Stjörnunnar var skárri en vörn Aftureldingar og Klaudia Pogawa byrjaði vel í marki Garðbæinga. Hún gaf hins vegar verulega eftir.

Stjarnan var þremur mörkum yfir í hálfleik, 13-16.

Seinni hálfleikurinn var svipaður framan af. Stjarnan leiddi með 2-4 mörkum en náðu ekki að slíta sig frá Aftureldingu fyrr en um miðbik seinni hálfleiks.

Þá fór mistökunum í sóknarleik Aftureldingar að fjölga og liðið átti í miklum vandræðum með að skora.

Bilið milli liðanna breikkaði síðasta stundarfjórðunginn og Stjarnan vann á endanum tíu marka sigur, 21-31.

Af hverju vann Stjarnan?

Stjörnukonur sýndu þolinmæði og keyrðu svo yfir Mosfellinga undir lokin. Stjarnan er með miklu meiri breidd en Afturelding og það sýndi sig á lokasprettinum.

Þá skoraði Stjarnan tíu mörk eftir hraðaupphlaup en Afturelding ekki neitt.

Hverjar stóðu upp úr?

Hornamenn Stjörnunnar léku afar vel í dag. Þær Hanna G. Stefánsdóttir, Dagný Huld Birgisdóttir og Stefanía Theodórsdóttir skoruðu samtals 19 mörk úr 23 skotum. Þá átti Hildur Öder Einarsdóttir fína innkomu í mark Mosfellinga.

Ragnhildur Hjartardóttir og Kristín Arndís Ólafsdóttir stóðu upp úr í liði Aftureldingar.

Hvað gekk illa?

Markverðir Aftureldingar náðu sér ekki á strik og liðið gerði alltof mörg mistök í sókninni, sérstaklega þegar á leið.

Hvað gerist næst?

Þetta var síðasti leikur liðanna fyrir jólafríið. Næstu leikir þeirra eru ekki fyrr en 18. janúar. Afturelding sækir þá HK heim á meðan Stjarnan fær topplið Fram í heimsókn.

Sebastian: Getum verið sátt með spilamennskuna hingað til

„Eru ekki allir leikir þolinmæðisvinna? Leikirnir okkar í vetur hafa verið svoleiðis. Við gerum alltaf ráð fyrir því að vera í hörkuleik fram í síðari hálfleik.“

„Það er mjög margt sem ég er ánægður með en það er alltaf eitthvað sem maður vill sjá betur gert. Markvarslan hefði mátt vera betri. Heilt yfir er ég ánægður með þennan leik,“ sagði Sebastian Alexandersson, þjálfari Stjörnunnar, í leikslok.

Að lokum var Basti spurður að því hvort það væri ekki dýrmætt að fara með sigur í jólafríið en hann segir það súrsætt í ljósi þess hve liðið er nálægt því að vera nær toppliðunum.

„Við töpuðum stigi á móti Val á ævintýralegan hátt og öðru stigi á Akureyri gegn KA/Þór með marki sem á aldrei eftir að sjást aftur. Með þau tvö stig værum við ansi nálægt toppnum. Við getum verið mjög sátt með okkar spilamennsku hingað til,“ segir Sebastian.

Hjörtur: Gáfum þeim leik í 45 mínúturHjörtur Örn Arnarson stýrði Aftureldingu í dag en Haraldur Þorvarðarson lét af störfum á dögunum.

„Mér fannst við alveg vera að gefa þeim leik í 45 mínútur. Mér fannst við vera inn í leiknum og vorum að gera ágætis hluti oft á tíðum. Svo kemur vondur kafli og mikil þreyta. Hópurinn er þunnur og mikið um meiðsli,“ sagði Hjörtur.

„Við missum leikinn frá okkur á stuttum kafla. Við vorum seinar til baka og það var ekki nógu gott að fá svona mörg mörk á okkur úr hraðaupphlaupum.“

Hvað tekur við hjá botnliði Aftureldingar í jólafríinu?

„Nú tekur við leit að arftaka Haralds og haldið áfram að æfa,“ sagði Hjörtur.