Engin smit greindust síðasta sólarhring

Enginn greindist með kórónuveiruna hér á landi síðastliðinn sólarhring samkvæmt nýjustu upplýsingum á vefsíðunni covid.is.

Þetta er því annar dagurinn í röð þar sem engin smit greinast. Tvö ný smit greindust í fyrradag en enginn hafði greinst með veiruna síðustu þrjá daga þar á undan.

Alls hefur 1.801 einstaklingur greinst með kórónuveiruna hér á landi. Átján manns eru í einangrun, tveir á sjúkrahúsi en enginn á gjörgæslu. Enn eru 698 manns í sóttkví. Tíu manns hafa látist vegna veirunnar.

Alls voru 341 sýni greind hjá Íslenskri erfðagreiningu síðastliðinn sólarhring og 174 hjá sýkla- og veirufræðideild Landspítalans.