Verkfallsundanþágur á Landspítala og Heilsugæslu

Félagsmenn stéttarfélagsins Sameykis og Sjúkraliðafélags Íslands sem starfa á Landspítalanum og Heilsugæslu höfuðborgarsvæðisins munu ekki taka þátt í fyrirhuguð verkfalli, sem á að hefjast á mánudaginn.

Í tilkynningu frá Sameyki kemur fram að undanþágunefndir beggja félaga hafi fallist á beiðnir um að félagsmenn á áðurnefndum vinnustöðum taki ekki þátt í fyrirhuguðu verkfalli 9. og 10. mars. Ástæðan er aukin útbreiðsla kórónuveirunnar sem valdið getur sjúkdómnum COVID-19. Þegar þetta er skrifað hafa 45 smittilfelli veirunnar verið staðfest, en þar af eru fjögur innanlandssmit.

Í tilkynningunni er þá ítrekað að enn séu tveir dagar til stefnu áður en að verkfall hefst og eru samningsaðilar hvattir til þess að ganga sem allra fyrst til samninga.