Tískuverslanir í eigu Kaupþings stefna í gjaldþrot

Gert er ráð fyrir að tískuverslunarkeðjurnar Oasis og Warehouse, sem eru í eigu Kaupþings ehf. óski eftir skipun skiptastjóra á næstunni. Um 2300 störf tapast, fari verslanirnar í þrot.

Þetta kemur fram á vef breska ríkisútvarpsins. Þar segir jafnframt að næsta víst sé að verslunarkeðjurnar muni fá Deloitte til þess að fara með gjaldþrotaskiptin.

Kaupþing ehf. er eigandi bæði Oasis og Warehouse. Kaupþing vildi árið 2016 selja verslanirnar og fékk árið 2017 tilboð í þær frá Ajay Khaitan, sem þá var eftirlýstur af Interpol fyrir meint skattsvik í Indlandi árið 1988. Kaupþing hætti þó við að selja honum keðjurnar.

Samkvæmt frétt BBC er einhver áhugi fjárfesta á keðjunum fyrir hendi. Ekki liggur þó fyrir hversu mörgum störfum yrði að endingu hægt að bjarga, sökum þeirrar efnahagslegu óvissu sem kórónuveirufaraldurinn hefur valdið.

Níutíu verslanir í Bretlandi á vegum keðjanna tveggja hafa verið lokaðar eftir að bresk stjórnvöld gripu til aðgerða til þess að halda útbreiðslu Covid-19 í skefjum.