Gylfi Þór vonast til að Everton endi tímabilið vel

Gylfi Þór Sigurðsson, miðjumaður íslenska landsliðsins og enska úrvalsdeildarfélagsins Everton, segir að frestun úrvalsdeildarinnar hafi komið sér einkar illa fyrir Everton þar sem hinn ítalski Carlo Ancelotti hafði aðeins verið þrjá mánuði starfi.

Gylfi Þór var í viðtali við Sky Sports í morgun en ensk félög hófu æfingar að nýju í gær.

Um frestun deildarinnar

„Hún hefur ekki komið sér vel. Við vorum að venjast nýjum þjálfara og vorum enn að læra hvað hann vill fá frá okkur. Okkur hlakkar samt til síðustu níu leikja tímabilsins. Vonandi getum við komið sterkir inn úr pásunni og endað tímabilið vel,“ sagði Gylfi í viðtalinu.

Um nýja stöðu í Everton-liðinu

Everton hefur aðallega spilað 4-4-2 leikkerfi síðan Duncan Ferguson tók við sem bráðabirgðastjóri og Ancelotti hefur haldið því áfram. Þar á undan hafði Gylfi Þór aðallega leikið í „holunni“ á bakvið framherja liðsins þar sem hann blómstraði. Skoraði hann til að mynda fjórtán mörk á síðustu leiktíð en nú er hann hluti af tveggja manna miðju ásamt því að spila einstaka sinnum út á væng.

„Ég hef verið hluti af tveggja manna miðju með íslenska landsliðinu og það er ekki mín náttúrulega staða á vellinum. Ég hef spilað flesta leiki (síðan Ancelotti tók við) og er orðinn vanur að spila þessa stöðu fyrir Ancelotti. Ég fæ ekki jafn mörg tækifæri til að fara fram á við og ég myndi vilja en þetta er eitthvað nýtt og ég nýt þess mjög.“

Um að spila fyrir luktum dyrum

Gylfi fylgdist vel með því þegar þýska úrvalsdeildin fór aftur af stað síðastliðna helgi en allir leikirnir fóru fram fyrir luktum dyrum. Slíkt hið sama verður upp á teningnum í ensku deildinni og Gylfi er ekki beint spenntur fyrir því.

„Ég held það eigi eftir að hafa gífurleg áhrif. Stuðningsmennirnir búa til andrúmsloftið og þeim fylgir mikil ástríða. Við leikmennirnir nærumst á því svo að sjálfsögðu veltir maður því fyrir sér hvernig það mun til dæmis vera að fagna marki.“

„Það verður allt öðruvísi að vinna leiki með enga stuðningsmenn í stúkunni en það verður ánægjulegt fyrir þá að hafa allavega fótbolta í sjónvarpinu. Vonandi er þetta bara fyrsta skrefið í rétta átt og við fáum stuðningsmenn aftur í stúkuna sem fyrst.“

Um ást sína á enska boltanum

Að lokum ræddi Gylfi um ást sína á enska boltanum en 2-1 sigur Íslands á Englandi á EM í Frakklandi sumarið 2016 er eftirminnilegasti leikur hans á ferlinum. Er hann með málverk af sér að faðma föður sinn í leikslok í stofunni heima hjá sér.

„Áhugi minn á enska boltanum byrjaði þegar ég var mjög ungur. Enska úrvalsdeildin var í sjónvarpinu og pabbi minn horfði venjulega á leiki með honum á bæði laugardögum og sunnudögum. Síðan fór ég á reynslu hjá nokkrum liðum og endaði á að skrifa undir hjá Reading.“

Þá viðurkenndi Gylfi að hann væri mjög spenntur fyrir því að komast aftur á æfingasvæðið.

„Það hefur verið ánægjulegt að eyða tíma með fjölskyldunni og hugsa um eitthvað annað en fótbolta. En ég og strákarnir í liðinu erum mjög spenntir fyrir því að komast aftur á æfingu,“ sagði Gylfi að endingu.