Ráðin upp­lýsinga­full­trúi vel­ferðar­sviðs borgarinnar

Hólmfríður Helga Sigurðardóttir hefur verið ráðin sem upplýsingafulltrúi velferðarsviðs Reykjavíkurborgar. Starfið var auglýst laust til umsóknar í byrjun apríl.

Í tilkynningu á vef borgarinnar segir að Hólmfríður hafi fjölbreytta og farsæla reynslu af störfum hjá fjölmiðlum á Íslandi, en síðustu fjögur ár hafi hún starfað sem blaðamaður á Stundinni.

„Áður vann hún meðal annars sem blaðamaður á Fréttablaðinu í sjö ár auk þess sem hún starfaði í afleysingum á fréttastofu RÚV um tveggja ára skeið.

Hólmfríður er viðskiptafræðingur að mennt með meistaragráðu í fjölmiðlun, samskiptum og mannvísindum frá UAB háskólanum í Barcelona og diplómagráðu í prisma frá Háskólanum á Bifröst.

Auk fyrrgreindra starfa hefur Hólmfríður einnig fengist við fjölbreytt verkefni; skrifað viðtöl og fréttir fyrir ýmsa prent- og netmiðla, gefið út eigin bók, séð um íslenskukennslu í Barcelona og árið 2016 starfaði hún sem kynningarstjóri Listahátíðar í Reykjavík.

Hólmfríður var valin úr hópi 79 umsækjenda og tekur hún til starfa um miðjan ágúst næstkomandi,“ segir í tilkynningunni.