Á­rásar­maðurinn nafn­greindur

Karlmaðurinn sem var handtekinn eftir hnífstunguárásina í Forbury Gardens og er grunaður um að hafa banað þremur heitir Khairi Saadallah. Þrír til viðbótar voru fluttir alvarlega slasaðir á sjúkrahús eftir árásina en einn hefur verið útskrifaður.

Sky News greinir frá því að Saadallah sé 25 ára hælisleitandi frá Libíu og hefur það eftir tveimur heimildarmönnum. BBC hefur einnig nafngreint manninn.

Árásin hefur verið flokkuð sem hryðjuverk og hefur breska hryðjuverkalögreglan tekið við rannsókn málsins.

Árásin átti sér stað um sjöleytið í gærkvöld að staðartíma. Árásarmaðurinn stakk nokkra sem voru staddir í garðinum og lýsir sjónarvottur því hvernig maðurinn gekk á milli hópa í garðinum og reyndi að stinga fólk.