Breskur fyrrum atvinnumaður kemur út úr skápnum

Englendingurinn Thomas Beattie, fyrrum atvinnumaður í fótbolta, upplýsti það í viðtali við ESPN í gær að hann væri samkynhneigður. 

Beattie var í unglingaakademíu Hull City á Englandi en spilaði sem atvinnumaður í Kanada og Singapúr. Hann er annar breski karlkyns fótboltamaðurinn sem kemur út úr skápnum. Áður hafði Justin Fashanu komið út sem samkynhneigður maður, en hann lék meðal annars með Newcastle, Nottingham Forest, Norwich og Manchester City. Fashanu féll fyrir eigin hendi árið 1998.

Beattie er einnig fyrsti karlkyns íþróttamaðurinn sem hefur spilað í stærstu íþróttadeildum Asíu sem opinberar samkynhneigð sína. 

Hann segist hafa fundið fyrir samfélagslegum þrýstingi að fela kynhneigð sína.

,,Ég hugsaði aldrei um að koma út á meðan ég var enn að spila. Mér leið bókstaflega eins og ég þyrfti að fórna öðru hvoru: hver ég er eða íþróttinni sem ég hef elskað frá því ég man eftir mér. Ég notaði fótbolta sem flóttaleið af einhverjum toga og á margan hátt bjargaði það mér, þar til ég var kominn á þann stað að ég þurfti að þroskast sem manneskja,“ segir Beattie.

,,Samfélagið segir mér að karlmennska tengist kynhneigð svo það að vera íþróttamaður í líkamlegri íþrótt var stór þversögn. Til að vera hreinskilinn er þetta enn nýtt fyrir mér og ferli sem er enn í gangi. Ég sagði nánum vinum og fjölskyldu frá þessu fyrir þremur mánuðum, það var þá sem ég ákvað að fara í þá vegferð að tala opinberlega um þetta,“ sagði hann um tilfinninguna að koma út. 

,,Ég er fullt af hlutum, einn af þeim er að vera samkynhneigður.“