Rivera talin hafa drukknað

Embætti lögreglustjórans í Ventura-sýslu gengur út frá því að leik- og söngkonan Naya Rivera hafi drukknað í Piru-stöðuvatni í suðurhluta Kaliforníu. Fjögurra ára gamall sonur hennar fannst sofandi um borð í bát sem þau höfðu tekið á leigu á miðvikudag.

Sonur hennar, Josey Hollis Dorsey, var í björgunarvesti þegar lögreglumenn komu að bátnum en um borð var björgunarvesti fyrir fullorðinn einstakling sem Rivera er talin hafa leigt fyrir sjálfa sig. Sonur hennar sagði lögreglumönnum að hún hafi stungið sér til sunds en ekki skilað sér aftur til baka.

Mæðginin leigðu bátinn klukkan 13 að staðartíma að því er fram kemur á vef BBC. Þegar þau áttu að skila bátnum þremur tímum seinna fóru starfsmenn að leita að þeim og þegar sonur hennar fannst um borð í bátnum var lögregla kölluð til.

Leitarskilyrði eru sögð vera erfið á svæðinu en eftir árangurslausa leit gengur lögregla nú út frá því að Rivera sé látin. Allt kapp sé þó lagt á að finna hana svo fjölskylda hennar geti fengið að kveðja.

Hin 33 ára gamla Rivera er þekktust fyrir leik sinn í sjónvarpsþáttunum Glee. Hún hóf leiklistarferil sinn aðeins fjögurra ára gömul. Þá á hún einn son, Josey, með leikaranum Ryan Dorsey en þau skildu árið 2018.