Gullboltinn ekki veittur í ár

Gullboltinn verður ekki veittur í ár vegna kórónuveirufaraldursins. Hann hefur verið veittur besta leikmanni Evrópu síðan 1956.

Keppni lá lengi niðri vegna kórónuveirufaraldursins og tímabilið í sumum deildum, eins þeim frönsku og hollensku, kláraðist ekki.

Að sögn Pascel Ferre, ritstjóra France Football sem stendur fyrir valinu, var ekki hægt að líta á þetta ár eins og hvert annað ár vegna áhrifa kórónuveirufaraldursins.

„Okkur fannst við vera að bera saman perur og epli því sumir leikmenn væru búnir að spila 35-40 leiki en aðrir 20-25 leiki. Svo má ekki gleyma því að svona árum, þegar EM fer ekki fram, ræður Meistaradeild Evrópu miklu um hver fær þessi verðlaun. En hún fer fram með öðru sniði í ár,“ sagði Ferre.

Hann segir að það hafi ekki verið sanngjarnt að veita Gullboltann í ár. „Við vildum ekki að sigurvegarar þessa árs yrðu stjörnumerktir vegna sérstakra aðstæðna,“ sagði Ferre.

Lionel Messi og Megan Rapinoe fengu Gullboltann í fyrra. Messi hefur oftast fengið Gullboltann, eða sex sinnum. Byrjað var að veita Gullboltann í kvennaflokki 2018.