Birkir Valur farinn til Slóvakíu | Ekki meira með HK í sumar

Birkir Valur Jónsson, hægri bakvörður HK í Pepsi Max deildinni í fótbolta, er farinn til Slóvakíu og mun ekki spila meira með Kópavogsliðinu í sumar.

Fótbolti.net greindi frá því í gær að Birkir Valur væri á leið til Spartak Trvnava í Slóvakíu á sex mánaða lánsamningi. Íþróttadeild Vísis fékk það svo staðfest nú rétt í þessu að hann væri farinn til Slóvakíu en ekki náðist í leikmanninn.

Engin félagaskipti hafa verið tilkynnt inn á vef Knattspyrnusambands Íslands en reikna má með að þau verði staðfest innan tíðar. Fær Spartak Trvana forkaupsrétt á Birki Val og ljóst að ef hann stendur sig gæti félagið keypt hann endanlega af HK.

Birkir Valur er fæddur árið 1998 en þrátt fyrir ungan aldur hefur hann leikið yfir 104 leiki fyrir HK í deild og bikar frá árinu 2015. Tókst honum að skora sex mörk í þeim, þar á meðal eitt í 3-0 sigri HK á Íslandsmeisturum KR fyrr í sumar.

Birkir á einnig 27 leiki fyrir yngri landslið Íslands.

Það er ljóst að félagaskiptin eru högg fyrir HK en Birkir er í raun eini hreinræktaði hægri bakvörðurinn á mála hjá félaginu. Brynjar Björn Gunnarsson – þjálfari liðsins – hefur verið óhræddur við að gefa ungum leikmönnum tækifæri og mögulega fær einn slíkur tækifærið nú.

HK er í 10. sæti Pepsi Max deildarinnar með átta stig eftir níu leiki. Næsti leikur liðsins er gegn KA á Greifavellinum á Akureyri þann 4. ágúst. Leikurinn verður sýndur beint á Stöð 2 Sport.