Pétur ráðinn til starfa hjá Borgar­leik­húsinu

Pétur Ármannsson hefur verið ráðinn dramatúrg í listrænu teymi Borgarleikhússins.

Í tilkynningu frá leikhúsinu segir að Pétur hefji störf þann 8. febrúar og muni hann jafnframt leikstýra einni sýningu á næsta leikári, 2020-2021.

„Pétur útskrifaðist sem leikari frá Listaháskóla Íslands 2012 og sótti starfsnám í leikstjórn hjá samtímaleikhúsinu Schaubühne í Berlín árið 2013. Hann rekur sviðslistahópinn Dance For Me ásamt eiginkonu sinni Brogan Davison og hlutu þau m.a. menningarverðlaun DV 2013 fyrir sýninguna Dansaðu fyrir mig.

Þau hafa sýnt verk sín víðsvegar um heim en Pétur hefur einnig unnið sem leikstjóri fyrir Íslenska dansflokkinn og Borgarleikhúsið og var tilnefndur sem leikstjóri ársins 2019 fyrir sýninguna Club Romantica, en verkið hlaut Grímuna sem leikrit ársins.,“ segir í tilkynningunni.