Aron Jóhanns skoraði og Elmar lagði upp | Aron Elís og Eggert mættust

Aron Jóhannsson skoraði í sænska bikarnum í dag og Theódór Elmar Bjarnason lagði upp mark í Tyrklandi. Aron Elís Þrándarson og Eggert Gunnþór Jónsson mættust í Íslendingaslag í Danmörku og Hólmar Örn Eyjólfsson lék í vörn Levski Sofia í Búlgaríu.

Elmar lagði upp þriðja mark Akhisarspor í 3-2 sigri gegn Osmanlispor. Með sigrinum komst Akhisarspor upp um tvö sæti en liðið er í 5. sæti með 41 stig, stigi á eftir næstu tveimur liðum en fimm stigum frá 2. sæti. Tvö efstu liðin komast upp í úrvalsdeild en liðin í 3.-6. sæti fara í umspil.

Aron Jóhannsson skoraði fyrsta mark Hammarby sem vann Sundsvall 4-0 í sænsku bikarkeppninni í dag. Hammarby vann þar með sinn riðil og er komið í 8-liða úrslit. Aron skoraði þrjú mörk í þremur leikjum í riðlakeppninni.

Hólmar Örn og félagar í Levski Sofia máttu sætta sig við markalaust jafntefli við Botev Vratsa í búlgörsku 1. deildinni. Levski er með 46 stig líkt og CSKA Sofia og Lokomotiv Plovdiv, en Ludogorets er efst með 52 stig og tvo leiki til góða.

Aron Elís Þrándarson lék sinn annan byrjunarliðsleik fyrir OB í 1-1 jafntefli við SönderjyskE á útivelli þar sem bæði mörkin komu úr vítum. Aron lék allan leikinn og Eggert Gunnþór Jónsson var í liði SönderjyskE fram á 68. mínútu er honum var skipt af velli. Liðin eru hlið við hlið í deildinni en OB er með 30 stig í 9. sæti og SönderjyskE með 26 stig.

Markvörðurinn Frederik Schram var hins vegar á varamannabekknum hjá Lyngby sem tapaði á útivelli gegn AaB. Lyngby er með 31 stig í 8. sæti.

Rúrik Gíslason sat sömuleiðis á varamannabekknum hjá Sandhausen í 2-2 jafntefli við St. Pauli. Sandhausen er með 29 stig í 13. sæti af 18 liðum, fimm stigum frá fallsæti og fjórum stigum frá umspilsfallsæti.