Þjálfari Lyon ánægður með Söru Björk og segir hana hafa aðlagast vel

Fjallað er um Lyon og úrslitaleikinn við Wolfsburg í Meistaradeild Evrópu í kvöld í stuttu myndbandi sem keppnin birtir á Twitter-reikningi sínum. Þar tjáir Sara Björk Gunnarsdóttir sig meðal annars ásamt þjálfara liðsins.

„Ég er ánægður með frammistöðu Söru Bjarkar Gunnarsdóttur, hún hefur aðlagast mjög hratt,“ sagði Jean-Luc Vasseur, þjálfari Lyon.

Eins og kemur fram í myndbandinu þekkir Sara Björk bæði lið út og inn, hafandi spilað fyrir Wolfsburg í fjögur ár áður en hún gekk í raðir Lyon í sumar.

„Það verður örugglega sérstakt að hitta þær á vellinum, en þegar leikurinn byrjar vill maður bara vinna og hugsar ekki um neitt annað,“ sagði Sara Björk. 

Leikurinn hefst í beinni útsendingu á Stöð 2 Sport 2 kl. 17:55 í kvöld en upphitun hefst kl. 17:30.