Ingibjörg lék allan leikinn í sigri

Ingibjörg Sigurðardóttir spilaði allan leikinn fyrir Valerenga í 2-0 sigri á Sandviken í úrvalsdeild kvenna í Noregi í dag.

Dejana Stefanovic kom heimakonum í Valerenga yfir á 34. mínútu og Synne Jensen bætti við marki á 61. mínútu. Mörkin urðu ekki fleiri og lokatölur 2-0 eins og áður segir.

Með sigri sínum í dag jók lið Valerenga forskot sitt á toppi deildarinnar í fjögur stig, en Avaldsnes og Rosenborg sem eru í 2. og 3. sæti eiga leik til góða. Ingibjörg og liðsfélagar hennar eru með 27 stig eftir tólf umferðir og hafa aðeins tapað einum leik það sem af er tímabilsins.