Fá rúmar 23 milljónir punda fyrir mann sem komst vart í hóp

Englandsmeistarar Liverpool hafa selt hinn unga Rhian Brewster til Sheffield United á 23.5 milljónir punda. Er hann sjöundi leikmaðurinn sem Sheffield fær til sín frá því að síðasta tímabili lauk.

Hinn tvítugi Brewster er dýrasti leikmaður í sögu Sheffield sem er athyglisvert fyrir þær sakir að hann tók aðeins þátt í fjórum leikjum með aðalliði Liverpool. Hann skrifar undir fimm ára samning við Sheffield.

Brewster lék með Swansea City í ensku B-deildinni á síðari hluta síðasta tímabils og skoraði tíu mörk í 20 leikjum. Eflaust hefur frammistaða hans þar sannfært Chris Wilder um að hann myndi bæta lið Sheffield sem hefur hafið tímabilið vægast sagt illa.

Liðið hefur tapað öllum þremur leikjum sínum í ensku úrvalsdeildinni það sem af er leiktíð. Ekki er næsti leikur auðveldur en liðið heimsækir Arsenal á sunnudaginn.