Afturhvarf til EM í Frakklandi í kvöld?

Ekki er útilokað að Ísland stilli upp nákvæmlega sama byrjunarliði og í leikjum sínum á EM 2016, þegar liðið freistar þess að komast nær næsta Evrópumóti með sigri á Rúmeníu í kvöld.

Ísland og Rúmenía mætast í undanúrslitum EM-umspilsins og sigurliðið sækir svo Búlgaríu eða Ungverjaland heim í úrslitaleik 12. nóvember. Í boði er sæti á EM næsta sumar þar sem Ísland yrði í riðli með Portúgal, Frakklandi og Þýskalandi.

Í fyrsta sinn síðan á EM eru allir þeir sem byrjuðu leikina fimm í Frakklandi í leikmannahópi Íslands. Kolbeinn Sigþórsson missti til að mynda af öllu HM-ævintýrinu og meira hefur verið um meiðsli og forföll.

Fastlega má gera ráð fyrir því að Hannes Þór Halldórsson verði í marki Íslands. Kári Árnason hefur hrist af sér meiðsli, líkt og Ragnar Sigurðsson sem missti af leikjunum í september, og þeir verða sennilega í hjarta varnarinnar. Gylfi Þór Sigurðsson og Aron Einar Gunnarsson verða á miðjunni. Annað er ekki eins öruggt.

Vísir tippar á að byrjunarlið Íslands verði svona skipað:

Þó að Birkir Már Sævarsson hafi verið valinn á ný í landsliðshópinn giskum við á að Guðlaugur Victor haldi sæti sínu í byrjunarliðinu, og leiki þar sem hægri bakvörður. Samkeppnin er hörð hjá Ara og Herði Björgvini Magnússyni en við teljum að Ari byrji sem vinstri bakvörður í kvöld.

Jóhann Berg er klár í slaginn og við teljum líklegra að hann byrji leikinn og fari frekar fyrr út af þurfi hann þess, eftir að hafa snúið aftur úr meiðslum um síðustu helgi. Kolbeinn Sigþórsson hefur komið inn á sem varamaður í þremur leikjum með AIK, eftir að hafa meiðst í upphitun gegn Englandi fyrir mánuði, og gæti mögulega byrjað leikinn í kvöld í stað Alfreðs eða Jóns Daða.

Þá gæti einnig verið að Ísland spili með þriggja manna miðju, með Gylfa fremstan en Aron og Birki eða Victor aftar. Þá yrði laus kantstaða, mögulega fyrir Rúnar Má Sigurjónsson eða Arnór Ingva Traustason. Byrji Jóhann ekki leikinn er líklegt að Rúnar geri það.

Einn úr nýrri gullkynslóð Rúmena í líklegu byrjunarliði

Samkvæmt rúmenskum miðlum er líklegt að Ianis Hagi, leikmaður Rangers, verði á varamannabekknum í kvöld. Mikið hefur verið rætt um frábæran árangur rúmenska U21-landsliðsins sem komst í undanúrslit á EM 2019 og tryggði sér sæti á Ólympíuleikunum, en aðeins einn úr því liði er í líklegu byrjunarliði. Það er George Puscas úr Reading, sem var næstmarkahæstur á EM U21 með fjögur mörk.

Talið er að byrjunarliðið verði þannig skipað:

Leikur Íslands og Rúmeníu hefst klukkan 18.45 í kvöld en leikurinn verður í beinni á Stöð 2 Sport og á Stöð 2. Upphitun hefst á Stöð 2 Sport klukkan 17.45 og á Vísi kl. 14.