Koeman: Suarez hefði getað valið að vera áfram

Ronald Koeman, stjóri Barcelona, tekur fyrir að hann hafi neytt Luis Suarez til að yfirgefa félagið í sumar en úrugvæski markahrókurinn gekk í raðir Atletico Madrid eftir að hafa verið tjáð að hann væri ekki í framtíðaráformum Barcelona.

„Ég gerði Suarez það ljóst að það hefði verið mjög erfitt fyrir hann að fá að spila en það voru engin vandamál í okkar samskiptum,“ segir Koeman sem tók við stjórnartaumunum hjá Barcelona og eitt af hans fyrstu verkum var að ræða við Suarez.

„Hann æfði eðlilega og æfði vel. Hann ákvað að lokum að fara en ég sagði við hann: Ef þú ferð ekki þá verður þú einn af hópnum og þá getur þú sannað að ég hafði rangt fyrir mér. Hann hefði getað verið hér áfram,“ segir Koeman.

„Mér líkar við Suarez en félaginu fannst kominn tími á endurnýjun og það sést á liðinu. Ansu Fati er að spila, hann er 17 ára gamall. Við erum með Pedri, 17 ára og hann mun fá tækifæri. Ronald Araujo er í sömu stöðu, 21 árs. Trincao er 20 ára og mun líka fá tækifæri. Við keyptum Sergino Dest sem er 19 ára. Þetta eru allt leikmenn framtíðarinnar,“ segir Koeman.

Aðalstjarna Barcelona, Lionel Messi, fór ekki leynt með skoðun sína á ákvörðun félagsins vegna Suarez en þeim var vel til vina og skilur Koeman vel að Messi hafi verið ósáttur með framgöngu Barcelona.

„Þegar þú hefur deilt klefa með einhverjum og fjölskyldur ykkar tengjast vinaböndum þá eru þessi viðbrögð eðlileg. Ég sagði við Messi að ég skildi það að hann væri vonsvikinn og það væri synd að Suarez væri að fara en þetta er ákvörðun félagsins,“ segir Koeman.

Suarez var fljótur að stimpla sig inn hjá Atletico en hann skoraði tvö mörk og lagði upp eitt í sínum fyrsta byrjunarliðsleik fyrir félagið.