Katrín Tanja heimspekileg nokkrum dögum fyrir heimsleikana

Katrín Tanja Davíðsdóttir verður eini fulltrúi Evrópu í ofurúrslitum heimsleikanna í næstu viku en nú eru aðeins átta dagar í fyrstu grein og enn styttra í að Katrín Tanja mæti á keppnissvæðið í norðurhluta Kaliforníu.

Katrín Tanja skrifaði stöðufærslu á Instagram síðu sína þar sem hún sagði frá áherslum sínum þessa mikilvægu daga fram að keppninni á heimsleikunum. Það er óhætt að segja að íslenska CrossFit drottningin sé frekar heimspekileg í færslunni sinni.

„Nokkur atriði sem ég verið virkilega að einbeita mér að undanförnu: Viðurvist. Meðvitund. Tilvera,“ skrifaði Katrín Tanja á ensku og notaði orðin: „Presence. Consciousness. Being.“

„Ég var að klára að lesa bókina „A new earth“ eftir Eckhart Tolle og mæli með henni fyrir þann sem er að leita sér að einhverju að lesa. Það stærsta sem ég tek úr þessari bók var núverandi móment og hvað maður gerir það með það,“ skrifaði Katrín Tanja og hélt áfram.

„Við festumst oft í fortíðinni sem er liðin eða látum hugsanir um framtíðina gagntaka okkur:

Hvað ef þetta gerist eða hvað gerum við þegar þetta er búið. Staðreyndin er sú að þegar það gerist þá verður það líka núið okkar. Allt okkar líf er núið og líf okkar er bara samansafn þess sem er að gerast núna,“ skrifaði Katrín Tanja eins og sjá má hér fyrir neðan.

„Ég er að einbeita mér að því að missa ekki af þessum mómentum í núinu og leyfa þeim ekki að fara framhjá mér án þess að ég taki eftir þeim. Ég hugsa um að hafa báðar fætur á jörðinni og anda í gegnum muninn og niður kokið. Ég hlusta á trén, horfði á stjörnurnar á himnum og tek þátt í góðum samræðum með því að taka alvöru þátt í þeim. Allt eru það hlutir sem hjálpa mér að upplifa þessa stund sem er núna,“ skrifaði Katrín Tanja

„Ég ætla líka að nota tækifærið til að vera þakklát fyrir þessa stund og fyrir fólkið sem ég er svo heppin að hafa í mínu lífi. Það gefur mér alvöru hamingjutilfinningu, “ skrifaði Katrín Tanja.

Margir litu svo á að um endurkomu hafi verið að ræða þegar Katrín Tanja tryggði sér á dögunum sæti meðal þeirra fimm CrossFit kvenna sem fá að keppa um heimsmeistaratitilinn.

Þrátt fyrir hafa ekki verið sannfærandi í keppnum sínum framan af árinu þá hefur Katrín Tanja núna haldið sér í hópi fimm bestu í heimi á sex heimsleikum í röð sem er magnaður árangur.

Nú er bara að vona að ofurúrslitin bjóði upp á greinar sem henti okkar konu vel en fyrsta greinin í lokaúrslitum heimsleikanna fer fram á föstudaginn eftir rúma viku.

Það lítur út fyrir að konurnar keppi í tíu greinum á þremur dögum og sunnudaginn 25. október kemur það síðan í ljós hver er þeirra fimm verður heimsmeistari í CrossFit árið 2020. Katrín Tanja varð heimsmeistari bæði 2015 og 2016 en Ástralinn Tia-Clair Toomey hefur unnið undanfarin þrjú ár.