Allt í blóma hjá Ungverjum eftir sögulega þynnku

Ungverjar hafa farið í gegnum rússíbanareið frá því að þeir mættu Íslendingum á EM 2016. Liðin mætast í úrslitaleik um sæti á EM, í Búdapest 12. nóvember.

Landsleikjatörn síðustu daga er nú lokið og leikmenn farnir til sinna félagsliða. Ísland lék þrjá heimaleiki og vann Rúmeníu í EM-umspilinu en tapaði svo fyrir Danmörku og Belgíu í A-deild Þjóðadeildarinnar.

Ungverjar léku aftur á móti þrjá útileiki og komust afar vel frá sínu. Þeir slógu Búlgari út úr EM-umspilinu, með 3-1 sigri, unnu svo Serba 1-0 í Belgrad og gerðu 0-0 jafntefli við Rússa.

Þegar Ísland og Ungverjaland mættust í riðlakeppni EM, með sína háværu stuðningsmenn á leikvanginum í Marseille, gerðu þau 1-1 jafntefli. Þá voru menn á borð við markmanninn Gábor Király, Zoltán Gera og Roland Juhász enn lykilmenn í ungverska liðinu en þeir lögðu landsliðstreyjuna á hilluna eftir mótið. Mikil endurnýjun hefur orðið hjá Ungverjum síðan þá, öfugt við Íslendinga sem gætu hugsanlega teflt fram sama byrjunarliði 12. nóvember og gert var í Marseille.

Töpuðu gegn Andorra

„Þynnkan“ eftir flotta frammistöðu á EM var söguleg hjá Ungverjum. Ákveðnum botni í merkri knattspyrnusögu þjóðarinnar var nefnilega náð þegar liðið tapaði 1-0 gegn Andorra í undankeppni HM, sumarið 2017.

Skömmu seinna hætti Þjóðverjinn Bernd Storck sem þjálfari Ungverja og Belginn Georges Leekens, sem Íslendingar þekkja kannski vegna starfa hjá Íslendingaliðinu Lokeren, tók við. Leikirnir fjórir hjá Ungverjum undir stjórn Leekens eru taldir þeir verstu hjá liðinu síðustu tvo áratugi og hann var strax látinn fara.

Ítalinn Marco Rossi hefur því stýrt Ungverjum frá árinu 2018. Hann er í miklum metum og hefur verið það frá því að hann stýrði Honved til ungverska meistaratitilsins árið 2017. Var því lýst sem kraftaverki.

Sterkur markmaður sem var á mála hjá Liverpool

Á þessu ári hefur Rossi breytt úr 4-2-3-1 kerfi yfir í 3-5-2 kerfi sem virkaði vel nú í haust, í sigrunum gegn Búlgaríu, Serbíu og Tyrklandi. Tveir lykilmenn í þessu kerfi mættu Íslandi 2016, þeir Adam Szalai og Nemanja Nikolic sem átti „stoðsendinguna“ í sjálfsmarki Birkis Más Sævarssonar undir lok leiks.

Tveir ungir og hæfileikaríkir leikmenn hafa verið að ryðja sér til rúms hjá Ungverjum. Roland Sallai er kantmaður Freiburg og miðjumaðurinn Dominik Szoboszlai er hjá Red Bull Salzburg. Sá síðarnefndi fékk þó ekki leyfi hjá sínu félagsliði til að taka þátt í síðustu landsleikjum.

Markmaðurinn Peter Gulácsi, sem um árabil var á mála hjá Liverpool án þess að leika með liðinu, er algjör lykilmaður hjá Ungverjum. Hann er í dag markmaður RB Leipzig líkt og miðvörðurinn Willi Orban sem einnig er Ungverjum afar mikilvægur.

Vonast eftir 20 þúsund stuðningsmönnum

Auk þess sem ungverska landsliðið virðist vera á réttri braut þá eiga Ungverjar lið í riðlakeppni Meistaradeildar Evrópu sem hefst í næstu viku. Ferencvaros leikur þá í keppninni í annað sinn eftir að hafa einnig verið þar árið 1995.

Þrátt fyrir að kórónuveirufaraldurinn leiki Ungverja grátt eins og marga aðra þá vonast þeir til þess að 20.000 stuðningsmenn liðsins verði á leiknum gegn Íslendingum. Reglur UEFA leyfa þann fjölda á svo stórum leikvangi eins og Puskás Arena er.