Segir af og frá að Rooney taki við Derby

Fyrr í dag fóru að kvisast út orðrómar þess efnis að staða Philip Cocu sem þjálfara Derby County í ensku B-deildinni væri í hættu. Liðið hefur aðeins unnið einn leik í fyrstu fjórum umferðum deildarinnar. Sá kom í síðustu umferð er liðið lagði Norwich City 1-0 á Carrow Road, heimavelli síðarnefnda liðsins.

Hinn 49 ára gamli Cocu hefur átt undir högg að sækja allt síðan hann tók við þjálfarastöðunni hjá Derby á síðustu leiktíð og í dag fóru orðrómar á kreik um að Wayne Rooney, leikmaður liðsins sem er einnig hluti af þjálfarateyminu, gæti tekið við af Cocu.

Mel Morris, eigandi félagsins, blés á slíkar sögusagnir í dag.

„Hann er undir álagi en hún kemur frá honum sjálfum, ekki okkur,“ sagði eigandinn um álagið sem er á þjálfara liðsins.

„Ég hef verið í þessum aðstæðum áður þar sem úrslitin eru slæm. Það er góður skilningur okkar á milli og við vitum af hverju hlutirnir hafa ekki fallið með okkur. Við erum öruggir um að áætlanir okkar muni snúa hlutunum við fyrr heldur en seinna.“

„Við höfum ekki einu sinni íhugað að eiga þær umræður,“ var svar Morris varðandi hinn 34 ára gamla Rooney sem þjálfara.

„Það er landsleikjahlé og slúðurmiðlarnir gera hvað sem þeir geta til að fá athygli. Wayne Rooney er stórt nafn og er það eflaust eina ástæðan fyrir að þetta kom upp,“ sagði eigandi Derby að lokum.

Derby County getur unnið sinn annan leik í röð er Watford heimsækir Pride Park annað kvöld. Hefst leikurinn klukkan 18.45 og er í beinni útsendingu Stöðvar 2 Sport 2.