Íslendingar gengu afar niðurlútir af Velodrome-leikvanginum í Marseille síðast þegar þeir mættu Ungverjum. Liðin mætast í úrslitaleik um að komast aftur á EM, í Búdapest á fimmtudaginn.
Þúsundir íslenskra stuðningsmanna fögnuðu þjóðhátíðardeginum 2016 í Marseille, kvöldið fyrir síðustu viðureign við Ungverja. Íslenska landsliðið hafði byrjað sitt fyrsta stórmót vel með 1-1 jafntefli við Cristiano Ronaldo og félaga, en menn urðu hins vegar afar vonsviknir með sömu úrslit gegn Ungverjalandi.
„Það var mjög þungt andrúmsloft í klefanum. Menn voru dálítið að tuða í hvor öðrum. Þetta var ekki neinum einum að kenna heldur verðum við að reyna sækja aðeins meira ef við ætlum að vinna leiki,“ sagði Ragnar Sigurðsson við Vísi eftir leikinn.
Þjálfarinn Lars Lagerbäck sagði Ísland hafa leikið án allrar skynsemi. Liðið hélt boltanum afar illa og það voru Ungverjar sem höfðu tökin, þó að þeir sköpuðu lítið af dauðafærum.
Ísland komst þó yfir á 40. mínútu með öruggri vítaspyrnu Gylfa Þórs Sigurðssonar. Ekki var alveg ljóst hvort vítið var dæmt vegna brots markmannsins Gabors Kiraly á Ragnari Sigurðssyni, eða brots varnarmanns á Aroni Einari Gunnarssyni strax í kjölfarið, en það skipti svo sem ekki máli.
Ísland var yfir fram á 88. mínútu, þrátt fyrir þunga pressu Ungverja, en þá varð Birkir Már Sævarsson fyrir því óláni að skora sjálfsmark af stuttu færi. Eins og myndin hér að neðan sýnir gat Birkir þó fátt annað gert en að reyna að komast í boltann, sem annars hefði farið fyrir fætur Ungverja fyrir galopnu marki.
Allir ellefu byrjunarliðsmenn Íslands frá því í leiknum í Marseille eru í hópnum sem mætir Ungverjalandi á fimmtudaginn. Það sama á við um Alfreð Finnbogason sem kom inn á sem varamaður.
Þeir Emil Hallfreðsson og Eiður Smári Guðjohnsen komu einnig inn á sem varamenn í leiknum en eru ekki með nú. Emil var ekki valinn og leikurinn við Ungverja reyndist næstsíðasti landsleikur Eiðs.
Hjá Ungverjum eru mun færri eftir úr hópnum sem lék í Marseille. Goðsagnir á borð við Király markmann og Zoltan Gera hafa lagt skóna á hilluna en Gera er reyndar aðstoðarþjálfari Ungverja í dag.
Fimm leikmenn sem mættu Íslandi í Marseille eru þó í ungverska hópnum núna. Ádám Lang, László Kleinheisler og Ádám Nagy voru í byrjunarliðinu, og þeir Nemanja Nikolic og Ádám Szalai komu inn á. Það var einmitt Nikolic sem að lagði upp sjálfsmarkið í lokin, sem tryggði Ungverjum dýrmætt stig.
Ungverjar enduðu efstir í riðli Íslendinga á EM, fyrir ofan Ísland vegna betri markatölu. Þeir mættu Belgum í 16-liða úrslitum og steinlágu, 4-0. Ísland komst hins vegar í 8-liða úrslit með 2-1 sigri á Englandi en féll þar úr leik eftir 5-2 tap gegn Frökkum.
Leikur Ungverjalands og Íslands verður sýndur í beinni útsendingu á Stöð 2 Sport 2 fimmtudaginn 12. nóvember klukkan 19.45 en upphitun hefst klukkan 18.45. Áskrift er hægt að kaupa hér en einnig verður í boði að kaupa stakan viðburð á myndlyklum Vodafone og Símans á kr. 990, sem og í vefsjónvarpi Stöðvar 2.
