Mæla gegn bólusetningu þeirra sem þjást af alvarlegum ofnæmum

Tilmælin voru gefin út eftir að tveir heilbrigðisstarfsmenn sýndu ofnæmisviðbrögð eftir að hafa fengið bóluefnið í gær.

Þau ná til þeirra sem hafa fengið alvarlegt ofnæmi eftir að hafa neytt matar eða lyfja, eða verið bólusettir með öðrum bóluefnum.

Einstaklingarnir sem sýndu ofnæmi eftir að hafa fengið Pfizer/BioNTech bóluefnið eru sagðir hafa sýnt svokölluð „anaphylactoid“ viðbrögð, sem BBC segir meðal annars felast í útbrotum, öndunarþyngslum og í sumum tilvikum blóðþrýstingsfalli.

Ekki er um að ræða sama ástand og „anaphylaxis“, það er að segja bráðaofnæmi eða ofnæmislost, sem getur valdið dauða.

Fólkið er sagt hafa náð sér en báðir einstaklingar höfðu áður sýnt alvarleg ofnæmisviðbrögð og gengu með adrenalínpenna á sér.

Haft er eftir Stephen Powis, framkvæmdastjóra lækninga hjá bresku heilbrigðisþjónustunni, að um sé að ræða algeng viðbrögð við nýjum bóluefnum og að tilmælin væru öryggisráðstöfun.

Í prófunum á bóluefninu sýndi einn af hverjum þúsund einstaklingum ofnæmisviðbrögð en mörg þúsund manns voru bólusettir í Bretlandi í gær.

Peter Openshaw, prófessor í ónæmisfræðum við Imperial College London, segir þá staðreynd að vitneskja liggi þegar fyrir um tilvikin tvö og að tilmælin hafi verið gefin út sýni að eftirlit með bólusetningaferlinu sé að virka.