Tæp­lega þúsund ný dauðs­föll rakin til Co­vid-19 í Þýska­landi

Dauðsföll í Þýskalandi af völdum Covid-19 voru 952 síðasta sólarhringinn, sem er nýtt met og rúmlega 27 þúsund manns greindust smitaðir.

Í Þýskalandi hefur verið lokað fyrir alla verslun og þjónustu, að matvöruverslunum og bönkum undanskildum. Veitingastaðir, barir og aðrir samkomusalir hafa verið lokaðir síðan í nóvember og enn harðari reglur hafa verið í gildi í sumum sveitarfélögum þar sem veiran hefur verið sérstaklega útbreidd.

Nú stendur einnig til að loka hárgreiðslustöðum auk þess sem áfengisneysla utandyra hefur verið bönnuð. Þá eru fyrirtæki hvött til að leyfa starfsfólki sínu að vinna heiman frá sér þar sem slíkt er gerlegt.

Alls hafa nú 23.427 dauðsföll verið rakin til Covid-19 í Þýskalandi frá upphafi heimsfaraldursins. Þá eru skráð smit í landinu nú um 1,4 milljónir.