Ná íslensku konurnar þrennunni í fyrsta sinn í kjöri Íþróttamanns ársins?

Tilnefningarnar voru opinberaðar á Þorláksmessu en það var topp tíu listinn fyrir kjör Íþróttamanns ársins og svo þrír þjálfarar og þrjú lið sem koma til greina sem þjálfari ársins og lið ársins.

Þrjátíu meðlimir úr Samtökum íþróttafréttamanna tóku þátt í kjörinu að þessu sinni en sjálft hófið fer ekki fram með hefðbundnum hætti í ár vegna samkomutakmarkanna. Kjörið verður í beinni útsendingu í kvöld á RÚV.

Það eru auðvitað margir tilkallaðir þegar kemur að verðlaunum sem þessum enda erfitt að bera saman íþróttagreinar og íþróttaafrek.

Það verða samt að teljast vera ágætar líkur á því að íslenskar konur geti náð þrennunni í fyrsta sinn í kjöri Íþróttamanns ársins. Það er fá öll þrjú verðlaunin í boði, Íþróttamann ársins, þjálfara ársins og lið ársins.

Knattspyrnukonan Sara Björk Gunnarsdóttir átti magnað ár þar sem hún hjálpaði tveimur liðum að komast í úrslitaleik Meistaradeildarinnar, varð fyrsta Íslendingurinn til að bæði vinna (spila í úrslitaleik) og skora í úrslitaleik Meistaradeildarinnar, vann fjóra stóra titla með liðum sínum í tveimur löndum, bætti landsleikjametið og hjálpaði Íslandi að komast inn á EM.

Það verður því að teljast mjög líklegt að Sara Björk verði kosin Íþróttamaður ársins í annað skiptið á ferlinum.

Kvennalið hafa tvisvar sinnum áður verið kjörin lið ársins og tvö af þremur liðum sem koma til greina í ár eru kvennalið. Íslenska kvennalandsliðið í fótbolta er líklegt til að hreppa hnossið að þessu sinni en margir leikmenn þess liðs eru líka leikmenn kvennaliðs Breiðabliks sem er einnig tilnefnt til verðlaunanna.

Einu verðlaunin sem hafa aldrei fallið í hlut konu á kjörinu eru aftur á móti verðlaunin fyrir þjálfara ársins. Þetta er í níunda skiptið sem Samtök íþróttafréttamanna velja þjálfara ársins og karlþjálfarar hafa unnið í öll skiptin síðan fyrsta kjörið fór fram árið 2012.

Elísabet Gunnarsdóttir var eina konan sem hafði verið tilnefnd áður en hún endaði í þriðja sæti í kjörinu fyrir árið 2017. Nú er Elísabet hins vegar tilnefnd aftur og að þessu sinni gerir hún svo sannarlega alvöru tilkall til verðlaunanna.

Elísabet Gunnarsdóttir hefur unnið markvisst af því að koma Kristianstad í hóp bestu liða Svíþjóðar og í ár kom hún liðinu í Meistaradeildina í fyrsta skiptið. Elísabet var valin þjálfari ársins í úrvalsdeild kvenna í Svíþjóð eftir að Kristianstad náði þessum besta árangri sínum frá upphafi.

Elísabet fær vissulega harða samkeppni um verðlaunin frá karlþjálfurunum Arnari Þór Viðarssyni og Heimi Guðjónssyni en aldrei áður hefur íslenskur kvenþjálfari verið nær því að vera kosin þjálfari ársins af Samtökum íþróttafréttamanna á Íslandi.