Starfsmaður Alþingis smitaður

Einn starfsmaður á skrifstofu Alþingis hefur greinst smitaður af kórónuveirunni sem veldur COVID-19. Tveir starfsmenn til viðbótar eru í fyrirskipaðri sóttkví eftir að hafa verið í samskipum við smitaða einstaklinga. Báðir þessir starfsmenn eru þó frískir. Þá eru nokkrir starfsmenn og þingmenn í sjálfskipaðri sóttkví í ljósi aðstæðna, ýmist af persónulegum heilsufarsástæðum eða einhvers nákomins.

Þetta kemur fram í tilkynningu á vef Alþingis. „Viðbragðsteymi Alþingis greindi frá því síðdegis í dag að niðurstaða úr skimun hefur leitt í ljós að einn starfsmaður skrifstofunnar er smitaður af kóróna-veirunni. Sá starfsmaður hefur verið veikur og í fyrirskipaðri sóttkví síðustu daga en er nú kominn í einangrun og er á batavegi," segir í tilkynningunni.

Þeim sem hafa verið í samskiptum við viðkomandi hefur verið greint frá stöðunni.