Einstök atkvæðagreiðsla í 1.090 ára sögu Alþingis

Efnahagsaðgerðir sem kostað gætu um eða yfir tuttugu milljarða voru samþykktar samhljóða í óvenjulegri atkvæðagreiðslu á Alþingi í dag. Aðgerðirnar tryggja umfangsmiklar greiðslur bóta til fólks sem neyðist til að lækka starfshlutfall sitt og laun til fólks sem þarf að sæta sóttkví. Heildarpakki stjórnvalda verður kynntur á morgun.

Atkvæðagreiðslurnar á Alþingi í dag eru þær sérkennilegustu sem þar hafa farið fram í tæplega ellefu hudruð ára sögu Alþingis. Steingrímur J. Sigfússon forseti Alþingis vék frá hefðbundinni framkvæmd atkvæðagreiðslna til að verða við kröfum Almannavarna og neyðaráætlun þingsins um bil á milli fólks og að sem fæstir komi saman í hóp. Fóru engar atkvæðagreiðslur fram um breytingartillögur samkvæmt heimild í þingsköpum sem sjaldan eða aldrei hefur verið notuð.

„Þá er forseti hefur ástæðu til að ætla að allir séu á einu máli eða úrslit máls séu ljós fyrirfram má hann lýsa því yfir að gert sé út um atriði án atkvæðagreiðslu ef enginn þingmaður krefst þess að hún fari fram,“ sagði Steingrímur og vitnaði til 1. greinar þingskapa.

Þegar kom að því að greiða atkvæði um málin að svo breyttu gengu þingmenn í þingsal úr setustofu við hlið þingsalar og út aftur um aðaldyr salarins að atkvæðagreiðslu lokinni. Frumvörpin um bótagreiðslur á móti skeru starfshlutfalli og laun til fólks í sóttkví voru bæði samþykkt samhljóða af þingmönnum bæði stjórnar- og stjórnarandstöðu.

Katrín Jakobsdóttir forsætisráðherra nauðsynlegt að endurskoða málin í maí út frá stöðu atvinnu og efnahagslífs.

„Það kann að vera að brýn þörf verði þá til að framlengja úrræðið. Ríkisstjórnin er mjög meðvituð um að þetta endurmat þarf að fara fram. Þetta mun verða eitt það mikilvægasta sem við gerum til að tryggja afkomu launafólks á Íslandi í gegnum þessar tímabundnu þrengingar,“ sagði forsætisráðherra.

Frumvarpið um bótagreiðslur á móti skertu starfshlutfalli tók nokkrum breytingum í velferðarnefnd og samkvæmt tillögum frá Ásmundi Einari Daðasyni félagsmálaráðherra seinnipartinn í gær, hvað varðar lágmarks starfshlutfall og hámark samanlagðra launa og bóta.

„Með þessari hugsun er ég sannfærður um að við komumst saman í gegnum þetta. Og ég vil hvetja bæði fyrirtæki og launafólk til að að nýta sér þetta úrræði,“ sagði félagsmálaráðherra.

Þingmenn Miðflokksins studdu bæði frumvörpin en hefði viljað hafa tekjumörkin hærri. En 900 þúsund eins og þau eru í lögunum sem samþykkt voru í dag.

„Við teljum að það hefði verið skynsamlegt að ganga hið minnsta upp að 950 þúsund krónunum, sem hefði verið vísitölubæting frá tölunni 2009,“ sagði Bergþór Ólason þingmaður Miðflokksins.

En flestir mæltu eitthvað á þessa leið með áminningu um að kannski þyrfti að bæta lögin seinna meir þannig að enginn félli milli þilja með aðgerðunum.

„Og ég trúi því að við séum að samþiggja hér mál sem geti komið að miklu gagni til að milda það högg sem hagkerfið er að ganga í gegnumá þessum erfiðu tímum,“ sagði Þorsteinn Víglundsson varaformaður Viðreisnar.