Í fimmta skipti greindist ekkert smit

Enginn greindist með kórónuveirusmit hér á landi síðastliðinn sólarhring samkvæmt nýuppfærðum tölum á Covid.is. Því hafa nú 1.799 greinst með veiruna hér á landi.

Er þetta í fimmta skipti frá 23. apríl sem ekkert smit greinist á sólarhring. Hafa verður í huga að sýni sem tekin voru í gær voru afar fá eða aðeins 71. 

Fjórir eru á sjúkrahúsi vegna Covid-19 og enginn er á gjörgæslu. Í einangrun eru 66, en þeim fækkaði um sex á milli daga, og 755 eru í sóttkví. Nú hafa 1.723 manns náð bata og 19.302 lokið sóttkví.

Alls hafa verið tekin 50.477 sýni og voru 69 tekin á síðastliðnum sólarhring. Öll voru tekin á veirufræðideild Landspítalans en ætla má að starfsfólk Íslenskrar erfðagreiningar hafi verið í fríi í gær.

Tíu manns hafa látist í faraldrinum til þessa.

Upplýsingafundur almannavarna vegna veirunnar er á sínum stað klukkan 14 í dag. Víðir Reynisson, yfirlögregluþjónn, Alma Möller landlæknir og Þórólfur Guðnason sóttvarnalæknir fara yfir stöðu mála með tilliti til Covid-19 hér á landi.