Tiger hætti með fyrstu kærustunni með því að senda henni bréf

Í fyrri hlutanum var fjallað um æsku Tigers og hvernig hann varð að besta kylfingi heims. Þar er einnig farið yfir sigursælan feril hans en einnig persónulega hluti.

Í seinni hlutanum er síðan farið yfir árin eftir að heimur Tiger Woods hrundi þegar upp komst um annað líf hans á bak við tjöldin. Þar er fjallað um skilnaðinn, bakmeiðslin og svo endurkomu hans á Mastersmótinu 2019.

Það kom margt og mikið fram í fyrsta þættinum en þar á meðal kom fram að Tiger hafi hætt með sinni fyrstu kærustu, Dina Parr, með því að senda henni bréf. Hún hafi ekki passað inn í framtíðarplön Tigers og foreldra hans.

„Earl og Tida [foreldrar Tigers] höfðu hugmyndir um hvernig hann ætti að vera. Og ég held að það hafi valdið þeim áhyggjum að ég passaði ekki inn í þeirra framtíðarplön,“ sagði Dina sjálf áður en hún las upp bréfið.

„Dina, ég er að skrifa þetta til þín því ég og foreldrar mínir viljum aldrei tala við þig aftur. Mér finnst þú og fjölskylda þín vera að nota mig. Ég vona að þú eigir gott líf. Ég veit að þetta er óvænt en mér finnst þetta það rétta. Sjáumst, Tiger,“ las hún upp eftir Tiger.

Aðspurð um viðbrögð hennar svaraði hún:

„Ég las þetta aftur og aftur í höfðinu og ég hugsaði um að keyra yfir til hans en svo varð ég bara að hugsa eins og hann væri dauður. Ég þurfti að gleyma honum og halda áfram með lífið, eins og hann væri ekki hérna.“

Diana Parr og Tiger Woods voru saman í þrjú ár. Hún segir einnig í myndinni að hún var sú einasta sem lét hann vita af því að lífið væri meira en bara golf.