Breyttu staðnum „úr helvíti í paradís“

„Staðurinn átti að opna snemma árs 2020 en ég gat ekki opnað vegna covid. Enginn gat unnið og framkvæmdirnar voru erfiðar. Þess vegna vorum við nokkrum mánuðum seinni á ferðinni,“ segir Yaman Brikhan, eigandi Ali Baba, í samtali við Vísi, en hann rekur einnig staði undir nafni keðjunnar í Hamraborg og í Kringlunni.

„Ég er himinlifandi með nýja staðinn og ég held að fólk kunni að meta hann líka. Gamli staðurinn var öðruvísi en í gær fengum við góðar viðtökur og fólk lýsti ánægju sinni með að við værum komin aftur í miðbæinn. Viðskiptavinur sagði við mig að við höfum breytt staðnum úr helvíti í paradís, að þetta liti miklu betur út og þeim þótti jákvætt að það væri komin önnur starfsemi í húsið frá því sem áður var,“ segir Yaman.

Fyrir var í húsinu skemmtistaðurinn Shooters sem lokað var fyrir fullt og allt haustið 2019. Shooters kom nokkrum sinnum fyrir í fréttum, meðal annars þegar lögregla innsiglaði staðinn um tíma í febrúar 2019 í tengslum við rannsókn lögreglu á umfangsmikilli brotastarfsemi. Þá greindi Stundin frá því árið 2015 að staðurinn hafi verið til skoðunar vegna meintrar vændisstarfsemi. Þar áður hafa hinir og þessir rekstraraðilar reynt að hreiðra um sig í húsnæðinu, sem hafa verið misjafnlega langlífir.

Eftir að Shooters var lokað kom fasteignafélagið Reitir áberandi skilaboðum fyrir í gluggum og fyrir inngangi húsnæðisins. „Þetta hús vantar nýja sögu. Ný saga í smíðum,“ sagði stórum stöfum. Og nú, um það bil ári síðar, hefur staðurinn fengið heilmikla yfirhalningu og kveðst Yaman ánægður með afraksturinn.

„Það voru margir sem söknuðu okkar. Örugglega svona um áttatíu prósent af þeim sem komu í gær voru fastakúnnar sem komu reglulega til okkar á gamla staðinn í Veltusundi. Þau voru glöð að fá okkur aftur,“ segir Yaman en hann telur nýju staðsetninguna vera betri en þá fyrri í Miðbænum.

Aðspurður segir Yaman reksturinn ganga upp þrátt fyrir erfiðleika af völdum áhrifa kórónuveirufaraldursins, en staðurinn opnaði um sex-sjö mánuðum á eftir áætlun. „Allir voru að bíða, svo það er ekki mér eða neinum öðrum að kenna en það voru reglur um hversu margir mættu vera við vinnu í framkvæmdunum,“ segir Yaman.

„Ég er mjög glaður að vera kominn aftur niður í bæ. Ég opnað Ali Baba fyrst í miðbænum 2009 þannig það eru margir sem eru kátir,“ bætir hann við. Hann hafi meira að segja fengið skilaboð og hamingjuóskir frá fastakúnnum sem búi í útlöndum en komi reglulega til Íslands.