Ronaldo hefur aldrei skorað í leik á móti Pepe

Pepe og félagar í Porto slógu í gær ítalska stórliðið Juventus út úr sextán liða úrslitum Meistaradeildarinnar.

Porto vann fyrri leikinn 2-1 og fór síðan áfram á mörkum á útivelli eftir 3-2 tap í gær.

Juventus fékk Cristiano Ronaldo til sín til að geta loksins farið alla leið í Meistaradeildinni en hefur nú dottið út úr sextán liða úrslitunum tvö ár í röð.

Ronaldo náði ekki að skora í hvorugum leiknum á móti Porto og var allt annað en sannfærandi. Landi hans Pepe átti aftur á móti stórleik í miðri vörn portúgalska liðsins. Pepe er 38 ára gamall eða tveimur árum eldri en Ronaldo.

Þegar menn fóru að skoða betur innbyrðis leiki Cristiano Ronaldo og Pepe kom það í ljós að Ronaldo hefur aldrei skorað í leik á móti Pepe.

Nú hafa þeir verið inn á vellinum sem andstæðingar í 299 mínútur án þess að Ronaldo hafi fundið leiðina í markið.

Pepe hefur þó oft séð Ronaldo skora enda hafa þeir verið liðsfélagar hjá bæði Real Madrid og portúgalska landsliðinu. Á þeim tíma hafa þeir unnið fjölda titla saman, þar á meðal Meistaradeildina þrisvar sinnum og bæði Evrópumótið og Þjóðadeildina með landsliðinu.