Íslenska deildin ekki hátt skrifuð hjá FIFA-spilurum

Vésteinn Örn Pétursson skrifar 10. apríl 2021 12:26

Úr viðureign Vals og KR í Pepsi Max-deild karla í sumar. Telja verður ólíklegt að hægt verði að leika með liðin, eða önnur lið úr deildinni, í FIFA 22. Vísir/Daníel Þór

Netkosning um hvaða knattspyrnudeildir ættu að vera í FIFA 22, næstu útgáfu knattspyrnutölvuleikjanna vinsælu, stendur nú yfir á vefsíðunni Fifplay. Pepsi Max-deild karla ríður ekki feitum hesti í kosningunum.

Um er að ræða árlega netkosningu þar sem FIFA-spilarar geta sagt sína skoðun á því hvaða deildir þykir vanta í leikinn. Síðan er þó ekki tengd EA, framleiðanda leikjanna, og því ljóst kosningin er í besta falli ráðgefandi.

Í kosningunni kennir ýmissa grasa, en sú deild sem situr efst í kosningunni er gríska úrvalsdeildin, með rúmlega 28 þúsund atkvæði. Næst á eftir kemur sú ungverska, með yfir 15 þúsund atkvæði. Efsta deild karla á Íslandi, Pepsi Max-deildin, er heldur neðar á listanum. Hún situr í 85. sæti. Þegar þetta er skrifað hafa 374 lýst yfir áhuga á að hægt sé að spila með lið og leikmenn deildarinnar í FIFA 22.

Rétt á undan íslensku deildinni er sú súdanska með 453 atkvæði. Þá nartar sú nýsjálenska í hæla Pepsi Max-deildarinnar, með 349 atkvæði. Hér er hægt að greiða atkvæði og skoða niðurstöður könnunarinnar.

Hægt hefur verið að leika með íslenska karlalandsliðið í FIFA frá því árið 2017, en fyrsta útgáfan sem bauð upp á Strákana okkar var FIFA 18.

FIFA Pepsi Max-deild karla Leikjavísir