Anníe Mist og Björgvin Karl þau einu sem væru inn á leikunum ef miðað væri við átta manna úrslitin

Undanúrslitamótin fara fram í júnímánuði og íslenska CrossFit fólkið þar af vinna sér þátttökurétt í gegnum mótin tvö sem fara fram í Evrópu. Mótin í Hollandi og Þýskalandi eru samt bæði netmót og því getur okkar fólki gert æfingarnar í sínum stöðvum.

CrossFit samtökin settu upp átta manna úrslitin sem álfukeppnir en sextíu efstu frá Evrópu komust sem dæmi áfram bæði í karla- og kvennaflokki.

Til að hita upp fyrir undanúrslitin þá hafa CrossFit samtökin nú tekið það saman hvar hver hefði endað í samanburði við alla aðra í heiminum.

Ísland á sjö flotta fulltrúa á undanúrslitamótunum en aðeins tvö þeirra enduðu með fjörutíu efstu. Það verða einmitt 40 karlar og 40 konur sem fá keppnisrétt á heimsleikunum í Madison í Wisconsin fylki í ágúst.

Björgvin Karl Guðmundsson varð í 36. sæti yfir allan heiminn en hann endaði í fimmta sæti í Evrópu.

Anníe Mist Þórisdóttir varð í 39. sæti yfir allan heiminn en hún endaði í níunda sæti í Evrópu. Katrín Tanja Davíðsdóttir endaði númer ellefu í Evrópu en það dugði henni bara í 47. sæti á heimsvísu.

Hin sem komust áfram í undanúrslitin frá Íslandi eru Haraldur Holgersson, Þröstur Ólason, Þuríður Erla Helgadóttir og Sólveig Sigurðardóttir.

Hér fyrir neðan má sjá frétt á Instagram síðu heimsleikanna í CrossFit um hvernig þetta hefði endað hefði verð raðað eftir heimsvísu en ekki eftir einstökum álfum.

Heimsmeistarinn óstöðvandi Tia Clair Toomey-Orr hefði að sjálfsögðu endað í fyrsta sæti og landa hennar Kara Saunders varð önnur en þær tvær höfðu nokkra yfirburði. Þriðja var síðan Ungverjinn Laura Horváth sem varð efst í Evrópu.

Anníe Mist og Kara Saunders eiga það sameiginlegt að vera nýlega orðnar mömmur sem gerir árangur þeirra enn eftirtektarverðari í þessari mjög svo líkamlega krefjandi íþrótt. Kara Saunders er á sínu öðru ári eftir barnsburð en Anníe Mist eignaðist stelpuna sína í ágúst síðastliðnum.

Hjá körlunum varð Bandaríkjamaðurinn Travis Mayer efstur en hann varð á undan landa sínum Scott Panchik og Kanadamanninum Jeffrey Adler. Efsti Evrópumaðurinn var Bretinn Reggie Fasa sem náði fimmtánda besta árangrinum á heimsvísu.