Bætt aðgengi kom sér vel við björgun slasaðrar konu

Davíð Már Bjarnason upplýsingafulltrúi Landsbjargar segir að konan hafi hrasað ofarlega í nafnlausa hryggnum svokallaða, rétt sunnan við virkasta gíginn í augnablikinu.

Sjúkraflutningafólk hafi komið að upphafi gönguleiðarinnar við Suðurstrandarveg og fengið far með björgunarsveitarfólki. Þeir voru á leiðinni niður aftur með konuna í bílnum nú stundarfjórðung í tíu.

Davíð Már segir að konan hafi verið frekar kvalin og því ákveðið að hika hvergi heldur sækja hana strax.

Gossvæðinu var lokað í vikunni til að bæta gönguleiðina á svæðið. Davíð segir breytinguna gera það að verkum að nú er mun fljótlegra fyrir viðbragðsaðila að komast að gossvæðinu.

Að neðan má sjá beina útsendingu úr vefmyndavél Vísis á svæðinu.