Tala látinna vegna kláf­ferju­slyssins hækkar

Samkvæmt frétt breska ríkisútvarpsins af málinu er níu ára barn meðal þeirra sem létust. Fimm ára barn var þá fluttur á sjúkrahús eftir slysið.

Áður hafði verið greint frá því að tala látinna væri minnst átta, en hún hefur hækkað eftir því sem björgunar- og leitaraðgerðum í braki ferjunnar hefur miðað áfram.

„Við erum aðframkomin af sársauka,“ hefur BBC eftir Marcella Severino, bæjarstjóra Stresa á Ítalíu. Ferjan var á leiðinni frá Stresa upp Mottarone-fjall þegar slysið varð. Bæjarstjórinn segir að erlendir ríkisborgarar, það er frá öðru landi en Ítalíu, hafi verið á meðal hinna látnu.

Mario Draghi, forsætisráðherra Ítalíu, segir slysið vera mikinn harmleik. Hann sé vel upplýstur um aðgerðir vegna slyssins og rannsókn innanríkisráðuneytisins á því.

„Ég votta fjölskyldum hinna látnu samúð ríkisstjórnarinnar. Hugur okkar er sérstaklega hjá börnunum sem slösuðust og fjölskyldum þeirra,“ sagði Draghi í yfirlýsingu í dag.