Eyjakonur geta í kvöld komist í lokaúrslitin í fyrsta sinn í sextán ár

ÍBV og Valur eru bæði í dauðafæri eftir útisigra í fyrsta leik um helgina og fá því heimaleik í kvöld.

ÍBV vann nauman 27-26 sigur á deildarmeisturum KA/Þór á Akureyri en Valskonur unnu sannfærandi 28-22 sigur á Fram í Safamýrinni.

Lið KA/Þór og Fram enduðu í tveimur efstu sætunum í deildarkeppninni en eru nú bæði í þeirri stöðu að þurfa að vinna í kvöld því annars eru liðin komin í sumarfrí. KA/Þór og Fram voru að spila sinn sinn fyrsta leik í úrslitakeppni um helgina en þau sátu hjá í fyrstu umferðinni.

Valskonur hafa verið fastagestir í lokaúrslitunum undanfarin ár og geta komist þangað í þriðju úrslitakeppninni í röð. Það er aftur á móti langt síðan Eyjakonur komust svo langt.

Takist Eyjaliðinu að tryggja sig inn í úrslitaeinvígið í kvöld verður það í fyrsta sinn í sextán ár sem ÍBV spilar um Íslandsmeistaratitil kvenna. ÍBV komst síðast í lokaúrslitin vorið 2005 þar sem liðið tapaði á móti Haukum.

Síðasti Íslandsmeistaratitill ÍBV liðsins vannst hins vegar árið 2006 en þá var engin úrslitakeppni.

Báðir leikirnir í kvöld verða sýndir beint á Stöð 2 Sport, leikur ÍBV og KA/Þór klukkan 18.00 og leikur Vals og Fram klukkan 19.40. Eftir leikina mun Seinni bylgjan gera upp báða leikina.

Olísdeildirnar í handbolta eru á Stöð 2 Sport en upplýsingar um útsendingar má finna hér. Olísdeildin er hluti af Stöð 2 Sport Ísland sem kostar 3.990 krónur á mánuði en einnig má kaupa útsendingar sem stakan viðburð á 990 krónur.