Margir hafa velt því fyrir sér hvort Bale muni leggja landsliðsskóna á hilluna eftir EM, en þessi 31 árs leikmaður á eitt ár eftir af samningi sínum hjá Real Madrid.
Í samtali við blaðamenn eftir tapið gegn Dönum sagði Bale að leikmenn liðsins hafi verið reiðir og pirraðir yfir því hvernig leikurinn tapaðist.
„Þetta eru vonbrigði, það er það eina sem ég get sagt,“ sagði Bale eftir leikinn í dag. „Við misstum af tækifærinu en ég get ekkert sett út á hvað við lögðum okkur mikið fram og það er það minnsta sem við getum gert. Ég er stoltur af okkur.“
En þegar Bale var spurður út í hvort að þetta hafi verið hans seinasti leikur fyrir velska landsliðið, stöðvaði hann viðtalið um leið.
Robert Page, þjálfari liðsins, kom leikmanni sínum þó til varnar.
„Af hverju ætti hann að vilja svara spurningu um framtíð sína?“ spurði Page. „Fyrir mér er þetta ónærgætin spurning. Hann er nýkominn af vellinum eftir tap og þetta snýst um hópinn og hvernig við komum til baka eftir þennan leik.“
EM 2020 verður sýnt á Stöð 2 Sport EM 2020 sem er hluti af Sportpakkanum, Stóra pakkanum og Risapakkanum. EM 2020 er einnig hægt að kaupa stakt á lækkuðu verði frá og með 24. júní á kr. 3.990.
