Skora á stjórnvöld að grípa til aðgerða því Covid auki ójöfnuð

Í skýrslunni segir að kórónuveirufaraldurinn sé líklegur til að hraða á þeirri þróun til aukins ójöfnuðar sem greina hefur mátt á Íslandi á undanförnum árum. ASÍ kallar því eftir aðgerðum af hálfu stjórnvalda meðal annars í baráttu gegn langtímaatvinnuleysi.

Í þessari fimmtu skýrslu hópsins er skoðað sérstaklega áhrif kórónuverufaraldursins á ójöfnuð. Stór hópur hefur orðið fyrir verulegri og mikilli lífskjaraskerðingu vegna atvinnuleysis. Í þeim hópi er að finna mikinn fjölda einstaklinga sem voru veikir fyrir en þurfa að sætta sig við hlutfallslega verulegt tekjufall.

„Á sama tíma hafi kaupmáttur aukist hjá þeim sem ekki hafa orðið fyrir teljandi skakkaföllum af völdum veirunnar. Eigendur hlutabréfa hafi hagnast vel. Húsnæðiseigendur hafi notið góðs af lágum vöxtum, minnkaðri greiðslubyrði og mikilli hækkun fasteignaverðs. Þetta auki ójöfnuð í eignaskiptingu og valdi misræmi í afkomu ólíkra samfélagshópa,“ segir í tilkynningu frá ASÍ.

En þar er kallað eftir markvissum aðgerðum stjórnvalda til að sporna gegn þessari vá.

Í sérfræðingahópi ASÍ og BSRB eiga sæti: 

• Halla Gunnarsdóttir, framkvæmdastjóri ASÍ, formaður. 
• Ásgeir Brynjar Torfason, doktor í fjármálum. 
• Guðrún Johnsen, efnahagsráðgjafi VR. 
• Sigríður Ingibjörg Ingadóttir, hagfræðingur BSRB. 
• Sigrún Ólafsdóttir, prófessor í félagsfræði. 
• Stefán Ólafsson, prófessor í félagsfræði. 
• Ásgeir Sverrisson, sérfræðingur ASÍ, starfar með hópnum. 
• Arnaldur Sölvi Kristjánsson, hagfræðingur ASÍ, sem vann með hópnum að gerð þessarar skýrslu.

• Covid-og-ójöfnuður_300621PDF430KB
  Sækja skjal