Ár frá sprengingunni í Beirút: Ráðamenn hunsuðu hættuna

Þetta kemur fram í nýrri skýrslu Human Rights Watch en þar segir að spilling í Líbanon komi í veg fyrir að hægt sé að draga ráðamenn til ábyrgðar og kalla samtökin eftir því að Sameinuðu þjóðirnar geri eigin rannsókn á sprengingunni og beiti aðgerðum gegn spilltum embættismönnum.

Minnst 218 manns dóu í sprengingunni og olli hún gífurlegum skemmdum á Beirút. Alþjóðabankinn hefur áætlað að sprengingin hafi valdið um 3,8 til 4,6 milljarða dala skemmdum.

Efnin höfðu þá verið í vöruskemmunni frá árinu 2014 og höfðu embættismenn ítrekað verið varaðir við hættunni frá þeim. Það var síðast gert í bréfi til Diab og Michel Aoun, forseta, rúmum tveimur vikum fyrir sprenginguna.

Hér má sjá myndband Sky News þar sem sprengingin er sýnd frá nokkrum sjónarhornum auk þess sem farið er yfir skemmdirnar sem hún olli.

Rannsókn þarlendra yfirvalda á sprengingunni hefur engum árangri skilað. Dómarinn sem stýrir rannsókninni hefur ekki getað rætt við embættismenn sem ekki er hægt að sækja til saka vegna laga Líbanon.

Á morgun (fjórða ágúst) verður liðið eitt ár frá því sprengingin varð. Síðan þá hefur ástandið í Líbanon versnað til muna og ekki þótti það gott fyrir.

Frá því fyrir ári síðan er virði gjaldmiðils Líbanons um það bil fimmtán sinnum minna en það var og verðbólga hefur leikið íbúa mjög grátt. Skortur er á matvælum, lyfjum og nauðsynjum. Þá hefur ekki tekist að mynda ríkisstjórn í landinu.

Saad Hariri, fyrrverandi forsætisráðherra, var fenginn til að reyna að mynda ríkisstjórn en honum mistókst það og sagði það vegna gífurlegrar spillingar í landinu.

Sjá einnig: Forsætisráðherra í þriðja sinn og heitir umbótum

Fyrir viku síðan var Nijab Mikati, ríkasti maður Líbanon sem hefur einnig áður verið forsætisráðherra, skipað að mynda ríkisstjórn.

Ráðamenn víða um heim hétu íbúum Beirút aðstoð en ekki fyrr en gripið væri til umbóta og dregið úr spillingu. Í Líbanon virðist þó lítill sem enginn áhuga á slíkum umbótum meðal þeirra sem þar ráða.

Í frétt Guardian segir að þeir hafi meiri áhuga á að deila sín á milli um það hvernig þeir geti deilt ríkinu sín á milli og gert sjálfa sig auðugri og valdameiri. Hryðjuverkasamtökin Hezbollah eru talin áhrifamestu aðilarnir í Líbanon.

Lítil sem engin aðstoð hefur því borist.

Starfsmenn HRW fóru yfir opinber gögn og ræddu við embættismenn og ráðamenn og komust að því að vitað hafi verið að efnin í vöruskemmunni væru hættuleg. Að embættismenn hafi brotið lög landsins með vanrækslu.

Yfirlit yfir samskipti ráðamanna sín á milli um efnin má finna hér á vef HRW.

Hér má sjá fleiri myndbönd af sprengingunni.

Efnin sem sprungu voru flutt til Beirút um borð í skipinu Rhosus árið 2013. Skipið var í eigu rússneskra aðila en skráð í Moldavíu. Til stóð að sigla því til Mósambík en skipstjórinn segist hafa fengið skipun um að fara til Beirút og taka þar aukafarm.

Embættismenn í Beirút kyrrsettu þó skipið og skipuðu áhöfninni að vera áfram um borð. Að endingu var farmurinn tekinn í land og áhöfninni sleppt árið 2014. Eigendur skipsins yfirgáfu það.

Skipið sjálft var að endanum fært um nokkur hundruð metra. Árið 2018 sökk það við bryggju í Beirút, þar sem það liggur enn. Skammt frá vöruskemmunni sem sprakk í loft upp.