Skraut af brúðartertu Karls og Díönu selst á 325 þúsund krónur

Fjöldi boða bárust í skrautið, sem er skjaldamerki konungsfjölskyldunnar. Sykur á marsípangrunni. Umrædd sneið var gefin Moya Smith, einum af starfsmönnum drottningarmóðurinnar, sem varðveitti hana í plastfilmu.

Flest boðanna komu frá Bretlandi, Bandaríkjunum og Mið-Austurlöndum en skrautið, sem var upphaflega metið á 300 til 500 pund, var að lokum slegið konungssinnanum Gerry Layton, sem hyggst varðveita það í safni sínu.

Að Layton látnum verður safnið gefið til styrktar góðgerðamálum.

Fleiri en 20 brúðkaupstertur voru gerðar í tilefni brúðkaups Karls og Díönu og víða erlendis tíðkast að geyma sneiðar í frysti. Þetta er því alls ekki í fyrsta sinn sem konunglegar kökur fara á uppboð en sneiðar úr tertum Karls og Díönu hafa áður selst á uppboði og einnig sneiðar úr brúðkaupstertu Vilhjálms og Katrínar Middleton.